ალოე

ალოე (Aloe), საბრი, აზუა, მრავალწლოვან ბალახოვან მცენარეთა გვარი შროშანისნაირთა რიგის ასფოდელუსისებრთა ოჯახისა (ხშირად აკუთვნებენ შროშანისებრთა ოჯახს).

აქვს გრძელი და შუბივით წამახული, ხორციანი, ხშირად ცვილისებრი ნაფიფქით დაფარული კიდეეკლიანი ფოთლები. 350-მდე სახეობა გავრცელებულია აფრიკაში მადაგასკარზე, არაბეთის ნ.-კ-ზე. საქართვ. სუბტროპ. რ-ნებში ძირითადად ხისებრ ა-ს (A. arborescens) აშენებენ. ა. სამკურნ. მცენარეა. მისი ფოთლების სქელი წვენი – საბრი, რ-იც ძველთაგანვე იხმარებოდა საქართველოში, კარგი სამკურნალო საშუალებაა. ნორჩი ფოთლების გამონაწვლილს ხმარობენ კანქვეშ შესაშხაპუნებლად თვალისა და სხვა დაავადების დროს. ა-ს წვნისაგან დამზადებული პრეპარატები იხმარება გარეგან საშუალებად ჩირქგროვის, დამწვრობისა და კანის ზოგიერთი დაავადების სამკურნალოდ. ა-ს აშენებენ ორანჟერეებსა და ოთახებში. 1950-იდან ა-ს აშენებდნენ ქობულეთის სამკურნ. მცენარეთა მეურნეობაში.