ლაბარტყავა გულთაზ ევგენის ძე

ლაბარტყავა გულთაზ ევგენის ძე (დ. 12. V. 1938, ქ. ფოთი), ეკონომისტი, ეკონომიკის მეცნიერებათა კანდიდატი (1971), საქართვ. დამს. ეკონომისტი (1982). 1962 დაამთავრა თბილისის სახელმწიფო უნივერსიტეტის  ეკონომიკის ფაკ-ტი ფინანსებისა და კრედიტის სპეციალობით. 30 წელი მოღვაწეობდა საბანკო სისტემაში: იყო თბილ. მშენებლობის ბანკის მმართველი (1971-87), საქართველოს ,,ბინ­სოც­ბანკის“ გამგეობის თავმჯდომარის მოადგილე (1991-92),  საქართველოს იპოთეკური ბანკის გამგეობის თავ-რე (1991).  

თითქმის 50 წლის განმავლობაში ეწეოდა პედ. მოღვაწეობას.  იყო გ. რობაქიძის სახ. უნ-ტის პროფესორი (2005−10); საქართვ. ეკონომიკისა და სამართლის სასწ. უნ-ტის პროფესორი, ბიზნესის მიმართულების პროგრამის ხელმძღვანელი და  ფაკ-ტის დეკანი  (2007−10); თბილ. პოლიტიკური აკადემიისა  (2008−09) და საქართვ.  სახალხო მეურნეობის მართვის ინ-ტის  (1982−86)  პროფესორი. 1993−95  მუშაობდა საქართვ.  მრეწველობის მინისტრის მოადგილედ, 1996−98 −  სს,,აგროინვესტის“ გენერალური დირექტორის მოადგილედ. 2008-იდან არის საქართვ.  ბიზნესის მეცნ.  აკადემიის  ნამდვილი წევრი, 2024-იდან კი  − საქართვ.  მწერალთა კავშირის წევრი.

   არის სამეცნ. ნაშრომების, პუბლიცისტური წერილებისა და ლექსთა კრებულების („ნატვრა“,  2019;  „ნანატრი ანგელოზები“, 2024) ავტორი.  საქართვ. „როტარი“ კლუბის,  საქართვ. მეწარმეთა და მოიჯარეთა კავშირის  პრეზიდიუმისა  (1993-იდან) და საზ-ბა „კოლხეთის“ (2010-იდან)  წევრი, აგრეთვე ბიზნესის მეცნ.  აკად. ჟურნალ ,,მოამბის“ რედკოლეგიის წევრი (2015-იდან).

   მიღებული აქვს ფოთის საპატიო მოქალაქის წოდება (2017).