კავთისხევის კატაულას წმინდა გიორგის ეკლესია

კავთისხევის კატაულას წმინდა გიორგის ეკლესია, ქართული ხუროთმოძღვრების ძეგლი. დგას სოფ. კავთისხევის (კასპის მუნიციპალიტეტი) მონა­სელიანთ უბანში. თა­რიღ­დე­ბა VII–IX სს-ით. ძეგლი სამეკლესიიანი ბაზი­ლიკაა (10,8მ × 7,65მ), ნაგებია ნატეხი ქვით. ძლიერ დაზიანებულია: გვერდის ნავები თითქმის საძირკვლამდეა დანგრეული, სამხრ. ნავის კედლები აქა-იქ ­მხო­ლოდ მცირე სიმაღლეზეა შემორჩენილი, ძნელი გასარჩევია ჩრდ. ნავის გეგმა. შედარებით კარგადაა შემონახული შუა ნავი, მაგრამ აქაც კედლების ზედა ნაწილები დაზიანებულია, სახურავი – ჩანგრეული. შესასვლელი სამხრ-ითაა. მეორე, უფრო ვიწრო კარი, ჩრდ. ნავში გადის. ნახევარწრიული აფსიდის ღერძზე თაღოვანი სარკმელია, ხოლო ჩრდ-ით – ერთი ნიში. ეკლესიაში კიდევ ორი სწორკუთხა სარკმელია. აფსიდის კონქიცა და დარბაზის ნახევარწრიული კამარაც წვრილი ქვითაა ამოყვანილი. ინტერიერში, განსაკუთრებით აფ­სიდში, ყურადღებას იპყრობს წყობაში ცერად ჩასმული მოზრდილი ქვების მწკრივები, რაც თავისებურ დეკორატიულ მორთულობად აღიქმება. ეკლესია მოგვიანებით შეულესავთ. შემორჩენილია მოხატულობის ფრაგმენტები. საკურთხევლის წინ იდგა VII ს. კატაულას სტელა (ინახება შ. ამირანა­შვი­ლის სახ. ხელოვნების მუზეუმში).

ლიტ.: სა­ქარ­თვე­ლოს ისტორი­ისა და კულტურის ძეგლთა აღწე­რი­ლობა, [ტ.] 5, თბ., 1990.

მ. მგალობლი­შვი­ლი