კავკასიური ბელადონა

კავკასიური ბელადონა, შმაგა (Atropa caucasica), მცენარე ძაღლ­ყურძენასებრთა ოჯახისა. შეუბუსავი, ლეგა ნაფიფქით დაფარული ღერო და დიდი, მოიისფრო-მოწითალო ყვავილები აქვს. გავრცელებულია კავ­კა­სიაში, აგრეთვე თურქეთისა და ირანის მომიჯნავე რაიონებში, სა­ქარ­თვე­ლო­ში – კოლხეთში, ქართლსა და შიდა კა­ხეთ­ში. იზრდება მთის შუა სარტყლამდე ტყეში (განსაკუთრებით ­წიფლნარ­ში), მეტ-ნაკლებად ­ჩრდილი­ან და ტენიან ადგილებში, ტყისპირებზე, ველობებზე, ნაკაფებ­ზე, ნახანძრალებზე და სხვ. სამკურნალო თვისებებით ბელადონას მსგავსია და სავსებით ცვლის მას (ალკალოიდები კ. ბ-ში კიდევ უფრო მეტია). ფოთოლს აგროვებენ მაისის ბოლოდან ივლისამდე (ჩვეულებრივ, ყვავილობის დაწყებისას). ფესურების შეგროვება სასურველია მაისში ან შემოდგომაზე. მოჰყავთ ღრმა, ფხვიერ, ტენიან და ნოყიერ ნიადაგზე (სასურველია კირიანი). ამრავლებენ თესლით, ფესურის ნაწილებით და კალმით. ნაყოფი შხა­მიანია.

მ. სახოკია