„თბილისის ცენტრალური ავტოვაგზალი“

„თბილისის ცენტრალური ავტოვაგზალი“ (სააქციო საზოგადოება), მგზავრთა საერთაშორისო და საქალაქთაშორისო სატრანსპორტო მომსახურების ცენტრალური დაწესებულება თბილისში. ავტოვაგზლის შენობა აიგო 1970 (არქიტექტორები: რ. კიკნაძე, ვ. ქურთი­შვი­ლი, შ. ყავლა­შვი­ლი; კონსტრუქტორი რ. შიოლა­შვი­ლი; მოზაიკური პანოს – „ავტოტრანსპორტის განვითარება” – მხატვარი ზ. წერეთელი), ხოლო საექსპლუატაციოდ გადაეცა 1973. იმ პერიოდისათვის იგი სამხრ. კავკასიაში ყველაზე დიდი ავტოსატრანსპ. კომპლექსი იყო. მდებარეობს ქალაქის სამხრ.-აღმ-ით, ორთაჭალის ხიდთან. ტერიტორიის ფართობია 2,5 ჰა, განაშენიანების ფართ. – 1800 მ², სასარგებლო – 7500 მ², სამუშაო – 6500 მ². შედგება მგზავრთა მოსაცდელი დარბაზისაგან, შიდასატრანსპ. ტერიტო­რიისა და ვაგზლისწინა მოედნისაგან; აქვს აგრეთვე ავტობუსების შესამოწმებელი და სარემონტო უბანი, 60-ადგილიანი სასტუმრო ტრანზიტული მძღოლებისა და მგზავრებისათვის. ავტოვაგზალში არის სამედ. პუნქტი, დედათა და ბავშვთა ოთახი, პოლიციის ოპერმუშაკთა, საერთაშ. და საქალაქთაშორისო სალაპარაკო პუნქტები, ვალუტის გადამცვლელი ჯიხური, საზ.კვების 6 ობიექტი, კაფე-ბარი, საყოფაცხოვრებო მომსახურების ობიექტები, ავტოსადგომი. მგზავრებს ემსახურება ბილეთების წინასწარი გაყიდვისა და დაჯავშნის სალაროები. ავტოვაგზალში დანერგილია თანამედროვე ელექტრონული ტექნოლოგიები. მისი გამტარუნარიანობა საათში 40 ავტობუსსა და 40 მიკროავტობუსს შეადგენს (დღე-ღამეში 18500 მგზავრი). 1995 წლის 1 იანვარს ავტოვაგზალი ჩამოყალიბდა სააქციო საზ-ბად.

ამჟამად ავტოსადგური ემსახურება საერთაშ. რეისებს აზერბაიჯანის, თურქეთის, ირანის, რუსეთის, საბერძნეთისა და სომხეთის მიმართულებით, ასევე კა­ხე­თისა და აჭარის რეგიონებში მიმავალ მგზავრებს. ყოველდღიურად საშუალოდ გადაჰყავს 2000 მგზავრი (2013 წ. მონაცემებით). თბილისში “თ. ც. ა-ის” გარდა მოქმედებს დიდუბის, ნავთლუღის, გლდანის ავტოსადგურები და ავტოსადგური „ოკრიბა”.