თედიაშვილი ალექსანდრე ვლადიმერის ძე

 

თედიაშვილი ალექსანდრე ვლადიმერის ძე (4. VIII. 1913, თბილისი, – 8. VI. 2014, იქვე), მსახიობი, სა­ქართვ. სახ. არტისტი (1980). 1936–41 იყო ცხინვალის სა­ხელმწ. თეატრის ქართ. დასის, ხოლო 1941–46 შორეული აღმოსავლეთის ფრონტის პირველი წითელ­დროშოვანი ანსამბლის მსახიობი, 1947–52 მოღვაწეობდა ცხინვალის კ. ხეთაგუროვის სახ. სა­ხელმწ. თეატრში, 1952 – თბილ. მოზარდ მაყურებელთა ქართ. თეატრში. ძირითადად ასრულებდა სახასიათო-კომედიურ როლებს. მისი საშემსრულებლო ხელოვნებისათვის დამახასიათებელია იმპროვიზაციულობა, მგზნებარე ტემპერამენტი, მოქნილობა და თავისუფლება. როლები: ქუჩარა (პ. კაკაბაძის „ყვარყვარე თუთაბერი”), ავეტიკა (ა. ცაგარლის „რაც გინახავს, ვეღარ ნახავ”), ელესია, შმაგა (ა. ოსტროვსკის „უეცარი სიმდიდრე”, „უდანაშაულო დამნაშავენი”), მირზა (ი. მოსა­შვი­ლის „ჩაძირული ქვები”), ნაცარქექია (გ. ნახუცრი­შვი­ლის „ნაცარქექია”) და სხვ. თ-ის შესრულება გამოირჩეოდა სასცენო მეტყველების ოსტატობით, მეტყველი მიმიკით. 1957-იდან მუშაობდა ცირკში – იყო საცირკო ხელოვნების პირველი ­ქართვ. კომიკოსი (ჯამბაზი), 1963–68 – ქართ. ცირკის სამხატვრო ხელმძღვანელი. მისი ავტორობით და რეჟისორობით 1965 დაიდგა საბავშვო საცირკო წარმოდგენა „ლურჯი მთების ლეგენდა” და მრავალი კლოუნადა. 1976–2004 იყო საცირკო-საესტრადო სასწავლებლის პედაგოგი. ავტორია წიგნისა „ცირკი – საოცრებათა ხელოვნება” (2004). დაჯილდოებულია „ღირსების ორდენით” (2000).