ბაბლუანი თეიმურაზ გელას ძე

ბაბლუანი თეიმურაზ (თემურ) გელას ძე (დ. 20. III. 1948, სოფ. ჩოლური, ლენტეხის მუნიციპ.), კინორეჟისორი, მსახიობი, პროდიუსერი. რუსთაველის სახელმწ. პრემიის ლაურეატი (1995).

სწავლობდა მოსკოვის სახელმწ. უნ-ტის იურიდიულ ფაკ-ტზე (1971‒73). დაამთავრა შოთა რუსთაველის სახ. თეატრ. ინ-ტის კინოფაკულტეტი (თ. აბულაძისა და ი. კვირიკაძის სახელოსნო, 1979). გადაიღო მხატვრული ფილმები „მოტაცება“ (მოკლემეტრაჟიანი, 1975), „ბეღურების გადაფრენა“ (1980), „ძმა“ (1982, XV საკავშ. კინოფესტ. პრიზი საუკეთესო დებიუტისთვის, 1982), „უძინართა მზე“ [1990, ბერლინის (გერმანია), სოჭის, მოსკოვის (რუსეთი) საერთაშ. კინოფესტივალების პრიზები; ეროვნული კინოფესტ. „ოქროს არწივის“ მთავარი პრიზი – ყველა – 1992; რუსთაველის სახელობის პრემია, 1995], „მემკვიდრეობა“ (გ. ბაბლუანთან ერთად, 2006), რ-ებშიც სხვადასხვა ცხოვრებისეულ და ისტ. მასალაზე განავითარა საკუთარი სიმართლისთვის მებრძოლი პიროვნების და ამ ბრძოლასთან დაკავშირებული პასუხიმგებლობის თემა.

ბ. ყველა თავისი ფილმის სცენარის ავტორია. როგორც მსახიობმა ერთ-ერთი მთვარი როლი (მურტალო) შეასრულა სატელევიზიო დადგმაში „კუკარაჩა“. მონაწილეობს რ. ჩხეიძის ფილმებში: „ღიმილის ბიჭები“ (მალხაზი, 1969), „მშობლიურო ჩემო მიწავ!“ (არწივის მომთვინიერებელი, 1980), „ცხოვრება დონ კიხოტისა და სანჩოსი“ (ეპიზოდ. როლი, 1989), გ. ბაბლუანის ფილმში „ცამეტი“ (2005, საფრანგეთი), 1991-იდან არის სტუდია „ადამ და ევას“ ერთ-ერთი დამფუძნებელი, გამგეობის თავ-რე და სამხატვრო ხელმძღვანელი.

ცხოვრობს და მუშაობს საფრანგეთში. ავტორია რომანისა „მზე, მთვარე და პურის ყანა: მანუშკა მელოდება“ (2018), რომელიც 2023 ითარგმნა ფრანგ. ენაზე;   2019 მიიღო პრემია „საბა“ წლის საუკეთესო ლიტ. დებიუტისთვის.

მ. კერესელიძე