კანდელაკი გელა ირაკლის ძე

კანდელაკი გელა ირაკლის ძე (დ. 27. V. 1940, თბილისი), კინორეჟისორი. 1958–61 სწავლობდა შოთა რუსთაველის სახ. თეატრ. ინ-ტის სარეჟისორო ფაკ-ტზე (მ. თუმანი­შვი­ლის სახელოსნო). 1965 დაამთავრა კინემატოგრაფიის საკავშ. სა­ხელმწ. ინ-ტის სადადგმო ფაკ-ტი დოკუმენტური კინოს რეჟისორის სპეციალობით (ი. კოპალიანის სახელოსნო). 1963-იდან მუ­შა­ობ­და სა­ქართვ. ქრონიკალურდოკუმენტური და სამეცნ.-პოპულ. ფილმების სტუდიაში. გადაიღო დოკუმენტური ფილმები: „დღეს" (1965), „გრძელი ღიღინი" (1966) და სხვ. 1969-იდან მუ­შა­ობ­და სა­ქართვ. ტელეფილმების სტუდიაში. აქ გადაღებულ დოკუმენტურ ფილმებს შორის აღსანიშნავია: „ფეხბურთი უბურთოდ" [ლ. სიხარულიძესთან ერთად, 1969; ერევნის, რიგის, კიევის საკავშ. კინოფესტივალებისა და კორტინა დ'ამპეცოს (იტალია) საერთაშ. კინოფესტივალის პრიზები, 1970], „ბავშვთა ნახატების გამოფენა" (1975), „იმერეთი" (1976), „ძველი კოლხეთის ქალაქი" (1984), „ვარძია" (1986) და სხვ. მთავარი როლი (გია აღლაძე) შეასრულა ფილმში „იყო შაშვი მგალობელი" (რეჟ. ო. იოსელიანი, 1970). გადაიღო მხატვ­რუ­ლი ფილმი „უბედურება" (დ. კლდია­შვი­ლის პიესის მიხედვით, 1979), დოკუმენტური ფილმი სა­ქარ­თველოზე „ხმელეთის 0,047%" [2007, მთ. პრიზი „ბრინჯაოს ტოტების კონა" კულტურათშორის საერთაშ. კინოფესტივალზე (ლემპო, საფრანგეთი), 2010]. 1979–89 ხელმძღვა­ნე­ლობ­და შოთა რუსთაველის სახ. თეატრ. ინ-ტის კინოფაკ-ტის ანიმაციური ფილმების სახელოსნოს (თ. გომელაურთან ერთად). არის დამოუკიდებელი სტუდია „კვალი XXI-ის" და მასთან არსებული ჩრდილების თეატრ „ბუდრუგანას" სამხატვრო ხელმძღვანელი.

მ. კერესელიძე