კიტია გიორგი (გია) დორიანის ძე

კიტია გიორგი (გია) დორიანის ძე (დ. 27. II. 1956, თბილისი), თეატრისა და კინოს რეჟისორი და მსახიობი, პედაგოგი. 1979 დაამთავრა მოსკოვის ა. ლუნაჩარსკის სახ. თეატრ. ინ-ტის ცირკის, ესტრადისა და მასობრივი წარმოდგენების სარეჟისორო ფაკ-ტი. სწავლის დამთავრების შემდეგ მუშაობდა მოსკოვის ცირკში („ცვეტნოი ბულვარი“). 1981–87 იყო თბილ. რუსული მოზარდ მაყურებელთა თეატრის, 1987–2007 კი ნ. დუმბაძის სახ. მოზარდ მაყურებელთა თეატრის რეჟისორი. 1981-იდან დღემდე თეატრ. უნ-ტის რეჟისურის კათედრაზე ეწევა პედ. საქმიანობას.

დადგმული აქვს სპექტაკლები: ო. ჰენრის „წითელკანიანთა ბელადი“, ე. შვარცის „თოვლის დედოფალი“, ნ. გლადკოვის „ბრემენელი მუსიკოსები“, ჯ. ჯერომის „ტომმი“ (გრან-პრი, დონის-როსტოვი, მსოფლიო საბავშვო თეატრის გენ. ასამბლეის ფესტივალი, 1995), ბ. ბრეხტის „კავკასიური ცარცის წრე“, უ. შექსპირის „ზაფხულის ღამის სიზმარი“, „საშობაო ზღაპრების“ სერია, ა. ეგზიუპერის „პატარა უფლისწულის ზღაპარი“, 1995-იდან არის საბავშვო თეატრების განვითარების ფონდის დამფუძნებელი და პრეზიდენტი. სხვადასხვა წლებში იყო საბავშვო სპექტაკლების ფესტივალების (მოსკოვი, ნოვგოროდი, ეკატერინბურგი, ტიუმენი, ვარშავა) ლაურეატი. 2003-იდან არის საქველმოქმედო ფონდ „იავნანას“ მთ. რეჟისორი.

კ. გადაღებულია ფილმებში: „მე, ბებია, ილიკო და ილარიონი“ (რეჟ. თ. აბულაძე, 1962), „ბიჭი და ჩიტი“ (რეჟ. კ. სურმავა, 1968), „რენე მიდის ჰოლივუდში“ (რეჟ. ა. ცაბაძე, 2010) და სხვ. 1999 დაჯილდოვდა „ღირსების ორდენით“.