ჯოვანი სკუდიერი

ჯოვანი სკუდიერი (1817-1851), არქიტექტორი, ეროვნებით იტა­ლიელი. დაიბადა პადუაში (იტალია). 1831 წელს იქვე დაამთავრა უმაღლესი საიმპერატორო სასწავლებელი. 1837 წელს გაემგზავრა რუსეთში. თავდაპირველად მუშაობდა ოდესაში. 1846 წელს კავკასიის მეფისნაცვალმა მ. ვორონცოვმა გადმოიყვანა თბილისში და დანიშნა თბილისის საქალა­ქო ხუროთმოძღვრის მოვალეობის ­შემსრულებლად. 1847 წლიდან იყო მეფისნაცვლის კანცელარიის საკარანტინო ნაწილის არქიტექტორი. სკუდიერის პროექტით აშენდა ყოფ. ვორონცოვის, იგივე მიხეილის ხიდი (ახლანდ. ჩუღურეთის ხიდი), მშრალი ხიდი, თეატრისა და ქარვასლის შენობა პასკევიჩ-ერივანსკის (ახლანდ. თავისუფლების) მოედანზე. Mმისივე რეკონსტრუირებული, ან აშენებულია, მეჩეთი ბოტანიკურ ბაღთან, მასვე ეკუთვნის საცხოვრებელი სახლების პროექტები, რო­მელთაგან დღემდე არც ერთი არ შემოინახა. თანამედროვენი სკუ­დიერის თვლიდ­ნენ „იტალიური სტილის“ გამავრცელებლად თბილისში.

სკუდიერი დაიღუპა თბილისში ტაძრის მშენებლობის დროს (შენდებოდა მისივე პროექტით).