მთიულასებრნი

მთიულასებრნი (Fringillidae), ფრინველთა ოჯახი ბეღურასნაირთა რიგისა. ოჯახი მოიცავს 212 სახეობას. მ. ფართოდ არიან გავრცელებული აფრიკაში (კ. მადაგასკარის გარდა), ევრაზიაში (კ. ახალი გვინეის გარდა), ამერიკაში. მათი სხეულის სიგრძეა 9,5_25,5 სმ., მასა - 8-86 გ. მრავალი მათგანი კარგი მგალობელია.

საქართველოში ბუდობისას გვხვდება 17 სახეობა, მათგან 12 მუდმივი ბინადარია (სკვინჩა, ქათქათა მთიულა, კულუმბური, მწვანულა, ჩიტბატონა, ჭივჭავი, მთის ჭვინტა, მეკანაფია, ნაძვის ნისკარტმარწუხა, სტვენია, თავწითელა მთიულა - მეჟოლია, დიდი კოჭობა), ორი მხოლოდ ბუდობს (ჩვეულებრივი კოჭობა და ფრთაწითელი მეოსპია), ორი ზამთრობს (მთიულა და ჩვეულებრივი ჭვინტა), ერთი იშვიათი შემომფრენია (ევროპული იადონი). მონოგამებია. ბუდობენ წყვილებად. იცავენ ე. წ. საბუდარ ტერიტორიას. დებენ 2-6, იშვიათად 8 კვერცხს, კრუხობა გრძელდება 10-14 დღ-ღ. იკვებებიან სარეველებისა და კულტ. მცენარეთა თესლით, კენკრით, ბუდობისას - მწერებითაც. ბუდობის დასრულების შემდეგ უმეტესწილად იკრიბებიან გუნდებად. დიდი კოჭობა დაცულია საქართვ. კანონმდებლობით.

ა. ბუხნიკაშვილი